Muittut, muitalusat -fidnu ulbmilin lea ovddidit ođđalágán sápmelaš čájáhusgiela museaid atnui. Dat sáhttá oasil buvttadit miellagiddevaš vásáhusaid gussiide ja veahkeha gussiid váldit vuostá museaid fállan dieđu buorebut.
Sápmelaš identitehta ii leat stahtalaš albmoneapmi, baicca dat nuppástuvvá áiggi mielde, go servvodatlaš, kultuvrralaš ja eará fáktorat váikkuhit dasa. Seammá láhkái galggašedje sámemuseaid čájáhusat – sihke bissovaš ja molsašuddi – eallit ja leat áigeguovdilat sihke álkit beaivádit ja nuppástuhttit.
Fidnu buktá sámemuseaid oktii Sámi davvi- ja máttaosiin. Fidnu váikkuhusa nanne dat, ahte fidnui oassálastet maiddái guokte universitehta Suomas ja Ruoŧas sihke eará mearkkašahtti doaibmit, geaid oktasaš viggamuššan lea dahkat juoidá áidnalunddot. Sámekultuvrra ja min sápmelaččaid muittuid dulkojit fidnus dáidaga ja musihka vugiiguin sámeartisttat ja -dáiddárat, mihttomearrin oppamáilmmálaš, sánehis ipmárdus.
Muittut, muitalusat lea ovttasbargofidnu, masa oassálastet Sámemusea Siida, Máttasápmelaš musea ja kulturguovddáš Saemien Sijte, Ruoŧa Duottar- ja sámemusea Ájtte, Lappi universitehta ja Luleju teknihkalaš universitehta.
Fidnu váldoruhtadeaddji lea Interreg Davvi -prográmma, ja našunála ruhtadeaddjit leat Lappi lihttu Suomas, Trøndelaga leana, Norsk kulturråd ja Sámediggi Norggas sihke Region Norrbotten Ruoŧas. Fidnobádji lea 1.1.2020–30.9.2022, ja fidnu bušeahtta lea sullii guokte miljovnna euro.
