Sämimuseo Siida lii Suomâ sämmilij aalmugmuseo, algâaalmugmuseo já väldikodálâš já kuávlulâš eromâšmuseo. Siida-rakanâs lii Aanaar kirkkosiijdâst Tave-Suomâst, já tast tuáimih oovtâst sehe Sämimuseo Siida ete Tave-Laapi luándukuávdáš. Siida lekkui 1998, mutâ sämimuseo historjá olá ennuv kuhheeb ááigán. Tot vuáđudui olgomuseon jo ive 1959 já lii puárásumos sämimuseo, mii lii ain tooimâst.
Siida-rakanâs láá tivomin já vijđedmin iivij 2020–2022. Uđâsmittem maŋa rakânâsân šadda Suomâ viijđásumos sämičuákáldâh. Siida haldâšem vyeln láá tääl 7 000 tävirid, já museo uđâsmittem ohtâvuodâst Suomâ aalmugmuseo maccât máávsulii 2 100 sämitäävvir čuágálduv Sämimuseon. Siida uđđâ fastâ čáitáldâh lekkâs cuáŋuimáánust 2022.
Noomâs miäldásávt Sämimuseo váldutárguttâssân lii palvâliđ sämmilijd já pyehtiđ oohtân nuorâ já puárásub sämmilijd. Museo pargon lii meiddei siäiluttiđ puáris ärbitiäđu já hammiđ siämmást uđđâ kulttuur nuuvt, ete ávhásteleh tááláá tutkâmuššáin já taiđuin, iärásij lasseen tuojijn argâpeeivi taaiđân. Nubben pargon lii uápásmittiđ ij-sämmilâš kuosijd sämmilâš eellimvuovvijd já išediđ iberdiđ sämmilâš maailmkove. Siida lii meiddei tehálâš mađhâšemčuosâttâh já tiätukuávdaš, kost finnee tiäđu kuávlu luándust. Siidast láá majemuu 20 ive ääigi kollim ohtsis paijeel miljovn kyessid.
Haahân uásálistee ulmuuh:
Sari Valkonen, museohovdâ
Eeva-Kristiina Nylander, proojeekthovdâ
Minna Lehtola, proojeektčällee
Eeva-Kristiina Nylander
eeva-kristiina.nylander(a)samimuseum.fi
Minna Lehtola
minna.lehtola(a)samimuseum.fi
